(ភ្នំពេញ)៖ បន្ទាប់ពីរកឃើញមានវិជ្ជមានវីរុសកូវីដ១៩ កាលពីថ្ងៃទី៥ ខែមេសា ឆ្នាំ២០២១ កន្លងទៅថ្មីៗនេះ លោក ម៉ៅ អាយុទ្ធ ដែលជាមន្ត្រីជើងចាស់ពោរពេញដោយសមត្ថភាពនិងទេពកោសល្យជំនាញផ្នែកនិពន្ធនិងដឹកនាំរឿងដ៏មានឈ្មោះល្បាញល្បីត្រូវបានទទួលមរណៈភាពនៅថ្ងៃទី១៥ ខែមេសា ឆ្នាំ២០២១ ដោយមេរោគកូវីដ១៩ នេះបើតាមលោក ផុស សុវណ្ណ អគ្គនាយក នៃអគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មានបញ្ជាក់។

ជាអតីតអគ្គនាយកនៃអគ្គនាយកដ្ឋានទូរទស្សន៍ជាតិកម្ពុជា លោក ម៉ៅ អាយុទ្ធ ក៏ត្រូវបានគេស្គាល់ថាលោកជាព្រឹទ្ធាចារ្យជាទីគោរពស្រលាញ់ និងអ្នកនាំខ្សែភាពយន្តដ៏ល្បីល្បាញម្នាក់ ក្នុងចំណោមអ្នកដឹកនាំរឿងជើងខ្លាំងដទៃ លោកស្នាដៃជាច្រើនក្នុងវិស័យសិល្បៈខ្មែរ។

ក្នុងវ័យអាយុ៧៧ឆ្នាំ លោក ម៉ៅ អាយុទ្ធ  បានទទួលមរណៈភាពដោយសារឆ្លងកូវីដ១៩ នៅមន្ទីរពេទ្យមិត្តភាពខ្មែរសូវៀត។